სრულიად საქართველოს კათოლიკოს-პატრიარქმა ილია მეორემ საპატრიარქოში საქართველოში სტუმრად მყოფი ინგუშები მიიღო.

"თქვენ არა მარტო საქართველოს პატრიარქი ხართ. ინგუშ ხალხს ისე ძლიერ უყვარხართ და გაფასებთ, როდესაც საქართველოდან სახლში ვბრუნდებით, გვეკითხებიან, გინახულეთ თუ არა. უბრალო ადამიანებს არ ესმით, რომ თქვენ ნებისმიერ დროს მიღება არ შეგიძლიათ, დიდი მარხვაა და ძალიან გადაღლილი ხართ მარხვის იმ წმინდა საქმით, რომელსაც ეწევით. მადლობა, რომ მიგვიღეთ", - განაცხადა შეხვედრაზე 76 წლის ინგუშმა პოეტმა ისა კოძოევმა.

პატრიარქი ინგუშების ყოფით დაინტერესდა და   მოუთხრო მათ მისი მშობლების შესახებ, რომლებსაც ინგუშები უყვარდათ და მათ სტუმრად იღებდნენ, უფენდნენ ხალიჩას ლოცვისთვის.

"დღე გავიდა და მადლობა უფალს. 4 იანვარს 82 წელი შემისრულდება. მე არ ვიცი, ეს წლები როგორ გავიდა", - აღნიშნა შეხვედრაზე კათოლიკოს პატრიარქმა.

უწმინდესს სტუმრებმა საჩუქრად სუვენირი ინგუშური კოშკი გადასცეს. საჩუქრები სტუმრებს პატრიარქმაც გადასცა.

(მოამზადა თეონა რამაზაშვილმა) reportiori.ge

P.S. საპატრიარქოს ცნობით, სრულიად საქართველოს კათოლიკოს-პატრიარქი, უწმინდესი და უნეტარესი ილია მეორე საკვირაო ლიტურგიას სამების საკათედრო ტაძარში აღავლენს.

ილია მეორე, ერისკაცობაში ირაკლი შიოლაშვილი, 1933 წლის 4 იანვარს ვლადიკავკაზში, გიორგი ღუდუშაური-შიოლაშვილისა და ნატალია კობაიძის ღვთისმოსავ ოჯახში დაიბადა.

1952 წელს ვლადიკავკაზის 22-ე საშუალო სკოლის დამთავრების შემდეგ სწავლა მოსკოვის სასულიერო სემინარიაში განაგრძო.

1957 წლის 16 აპრილს სასულიერო აკადემიის მე-2 კურსის სტუდენტი ილია მეორე საქართველოს მაშინდელი კათოლიკოს-პატრიარქის მელქისედეკ III-ს ლოცვა კურთხევით თბილისის წმ. ალექსანდრე ნეველის სახელობის ტაძარში ბერად აღკვეცეს და მას სახელად ილია უწოდეს. 1960 წელს დაამთავრა მოსკოვის სასულიერო აკადემია პირველი ხარისხის დიპლომით.

1963 წლის 26 აგვისტოს საქართველოს მაშინდელი კათოლიკოს-პატრიარქის ეფრემ II-ის მიერ არქიმანდრიტი ილია ბათუმ-შემოქმედის ეპარქიის ეპისკოპოსად აკურთხეს, 1967 წელს კი ცხუმ-აფხაზეთის ეპისკოპოსად გადაიყვანეს. ორი წლის შემდეგ ილია მეორე მიტროპოლიტის ხარისხში აიყვანეს. ილია მეორემ სოხუმში 11 წელი დაყო.

საქართველოს მაშინდელი კათოლიკოს-პატრიარქის დავით V-ს გარდაცვალების შემდეგ, 1977 წლის 23 დეკემბერს საქართველოს მართლმადიდებელი ეკლესიის წმინდა სინოდმა ილია მეორე კათოლიკოს-პატრიარქად აირჩია. ილია მეორის ინტრონიზაცია 1977 წლის 25 დეკემბერს სვეტიცხოვლის საკათედრო ტაძარში მოხდა.

ბოლო 37 წლის მანძილზე საქართველოს ეკლესიის ეპარქიათა რიცხვი 15-დან 46-მდე გაიზარდა, პატრიარქის ჩათვლით კი 48 მღვდელმთავარი. გაიზარდა ასევე ეკლესია-მონასტრებისა და სასულიერო პირების რიცხვი. მოხდა ახალი წმინდანების კანონიზირება. აშენდა საქართველოში ყველაზე დიდი ეკლესია _ წმ. სამების სახელობის საკათედრო ტაძარი.

დღეს, საღამოს 8 საათზე, პატრიარქის იუბილესთან დაკავშირებით ფილარმონიაში კონცერტი გაიმართება.